Profundidade de corte en torno

Nas operacións que se realizan no torno, a peza suxéitase no cabezal ou chuck e faise xirar a gran velocidade, mentres a ferramenta de corte se empurra, nun movemento de avance, sobre a superficie da peza para darlle forma. O resultado é a eliminación do material sobrante por arranque de aparas. Pero cal é a importancia da profundidade de corte en torno para poder obter os resultados desexados?

Parámetros de corte no torneado

Hoxe en día é posible atopar distintos tipos de torno na industria: paralelo, vertical, copiador, automático, revólver, de control numérico computarizado, etcétera. Pero que teñen en común estes tornos? Ademais de realizar operacións de torneado (algúns teñen máis funcionalidades ca outros), réxense polos mesmos parámetros de corte para poder mecanizar.

Sen os parámetros adecuados, as operacións de mecanizado simplemente serían imposibles de realizar ou os resultados non serían os desexados. Cales son estes parámetros e como se calculan?

• Velocidade de corte, que se expresa en metros/minuto.
• Revolucións por minuto do cabezal (rpm).
• Velocidade de avance.
• Profundidade de corte en torno ou profundidade de pasada.
• Diámetro exterior.
• Esforzo de corte.
• Elección da ferramenta de corte adecuada.
• Tipo de torno.

Velocidade de corte

É a velocidade lineal da superficie da peza que entra en contacto coa ferramenta. Exprésase en metros por minuto e debe escollerse antes de iniciar o mecanizado. Este parámetro depende do tipo de ferramenta, da profundidade de pasada, da dureza do material, da maquinabilidade do material e, por suposto, do tipo de traballo que se desexe realizar. Ademais, para escoller a velocidade de corte, tamén deberá terse en conta a velocidade de avance.

A partir da velocidade de corte poden determinarse as revolucións por minuto.

Revolucións por minuto do cabezal

As revolucións por minuto (RPM) expresan a velocidade de xiro, é dicir, o número de voltas que un obxecto xira sobre o seu propio eixe durante un minuto.

Velocidade de avance

A velocidade de avance é a velocidade que existe entre a peza que se vai mecanizar e a ferramenta de corte, é dicir, a velocidade coa que se produce o corte. Denomínase avance por revolución e depende do diámetro da peza, da profundidade de corte en torno e da ferramenta escollida.

Diámetro exterior

Para calquera tipo de mecanizado é imprescindible coñecer o deseño e a forma que se lle quere dar á peza. No caso das operacións de torneado, é necesario coñecer o diámetro exterior da peza para poder determinar a profundidade de pasada, así como a velocidade de avance.

Esforzo de corte

O esforzo de corte é un parámetro que se necesita para calcular a potencia requirida para mecanizar. Calcúlase de acordo co avance da ferramenta, a velocidade de corte e a profundidade de pasada.

Elección da ferramenta de corte adecuada

Como no torno se poden realizar múltiples operacións de mecanizado, é fundamental escoller a ferramenta adecuada. Por exemplo, para tradear haberá que escoller unha broca e para rañurar unha ferramenta mortalladora, etcétera.

Tipo de torno

Como xa adiantamos, existen múltiples tipos de torno na industria, pero non todos teñen as mesmas funcionalidades; así, un torno paralelo non fai os mesmos traballos ca un torno copiador ou un de control numérico CNC. Por iso, para realizar o mecanizado de forma adecuada é imprescindible escoller a máquina ferramenta que máis se adapte ás necesidades de mecanizado.

Que é a profundidade de corte en torno?

A profundidade de corte en torno ou profundidade de pasada é un parámetro desta máquina ferramenta que serve para determinar a medida na que a ferramenta penetra na peza con cada pasada de mecanizado. É dicir, é a profundidade da capa que se arranca da superficie da peza nunha pasada da ferramenta. Este parámetro adoita expresarse en milímetros e tamén se ten en conta a anchura do corte, que é o ancho da parte da peza mecanizada.

Por que é tan importante a profundidade de corte en torno? Xoga un papel clave para calcular a sección das aparas e, en consecuencia, a forza que se debe aplicar para mecanizar. Así, a profundidade de pasada pode definirse como a distancia á que penetra a ferramenta na superficie da peza cada vez que entra en contacto con ela.

Ten as seguintes características:

• Conta cun valor máximo admisible.
• Se se desexan cortes profundos, será necesario facer varias pasadas de forma repetitiva sobre o mesmo punto da superficie da peza.
• Depende da ferramenta e da rixidez, así como da potencia da máquina, a velocidade de avance, o material e o deseño da peza.
• O valor da profundidade de pasada debe ser maior que o raio da punta da ferramenta de corte.

Cada operación de torneado deberá ter unha profundidade de corte diferente. Non é o mesmo facer un rañurado, no que se produce arranque de aparas cunha ferramenta mortalladora, que facer un rectificado, onde o mecanizado se fai por abrasión e se leva a cabo cunha moa.