Para que serve a fresadora vertical?

A fresadora é unha máquina ferramenta moi utilizada nos obradoiros de mecanizado que funciona grazas á acción dunha ferramenta provista de múltiples fíos, denominada fresa, que se achega á superficie da peza que se vai mecanizar e produce o arranque de aparas. Dentro dos distintos tipos de fresadoras que existen atopamos a fresadora vertical, pero para que serve e como funciona esta máquina ferramenta?

Que é unha fresadora vertical?

Na metalmecánica existen tres tipos diferentes de mecanizado: sen arranque de aparas, con arranque de aparas e por abrasión. O mecanizado por arranque de aparas produce a eliminación de material de pequenas dimensións, en forma de láminas (a estas chámaselles aparas). Unha das máquinas capaces de realizar este tipo de mecanizado é a fresadora. Dentro dos distintos tipos de fresadoras que existen na industria, podemos atopar a fresadora vertical.

A fresadora vertical é unha das máquinas ferramenta máis utilizadas nos obradoiros de mecanizado grazas á súa versatilidade. Este tipo de máquina elimina o metal sobrante dunha peza a través da ferramenta rotativa que se denomina fresa. A fresa ten a característica de ser xiratoria e estar provista de varios dentes, fíos ou placas dun metal moi duro e resistente.

Esta máquina ferramenta segue un percorrido lonxitudinal ao longo da peza cun movemento rotatorio. Grazas a estes movementos retírase o material sobrante da superficie dunha peza e dáselle a forma desexada.

Tipos de fresadoras

Antes de especificar para que serve a fresadora vertical, é importante salientar que hoxe en día existen moitos tipos de fresadoras. Estas poden clasificarse segundo a orientación do eixe de xiro ou o número de eixes cos que contan para o mecanizado. Así, dentro dos tipos de fresadoras segundo a orientación da ferramenta atopamos:

• Fresadora horizontal: provista de fresas cilíndricas que se colocan sobre un eixe horizontal e que permiten realizar o rañurado (mecanizado por mortallado) de diferentes pezas.
• Fresadora vertical: na que o eixe, como o seu nome indica, se coloca no plano vertical. Este tipo de fresadoras é bastante utilizado porque permite realizar cortes con maior profundidade cós que realiza a fresadora horizontal. Á súa vez, é posible atopar unha subclasificación das fresadoras verticais: de banco fixo e de torreta ou de consola.
• Fresadora universal: pode acoplarse tanto ao eixe horizontal coma ao vertical. Non é unha fresadora moi utilizada, pero conta coa característica de poder converterse en vertical, sempre e cando se utilicen os accesorios ou as ferramentas necesarias para iso.

Características da fresadora vertical

Na fresadora vertical, o fuso portaferramentas colócase de tal maneira que a fresa pode xirar sobre o seu eixe horizontal e de forma perpendicular á peza, suxeita na mesa de traballo. Nesta máquina, a ferramenta de corte ten un movemento ascendente e descendente polo que o fuso se achega directamente á superficie da peza.

Como xa adiantamos, a fresadora vertical pode dividirse en dúas:

• Vertical de banco fixo: o único movemento é o da fresa; o cabezal permanece estático. O movemento provén da mesa.
• Vertical de torreta ou consola: admite movementos do seu cabezal en horizontal e ata 180º, seguindo o eixe horizontal da peza.

Na fresadora vertical, ademais, a base e a columna son de fundición e o cabezal que aloxa o fuso pode moverse de arriba abaixo e viceversa; os cabezais nestas máquinas poden ser fixos ou oscilantes e as pezas que se van mecanizar realizan movementos nos planos horizontal ou vertical.

Para que serve a fresadora vertical?

Grazas a que o eixe deste tipo de máquina ferramenta se atopa perpendicular á mesa de traballo, pódense realizar múltiples operacións de mecanizado. Unha das máis comúns é o desbaste de materiais, o que permite a elaboración de pezas complexas e de calquera deseño.

Por outra banda, ao mover o fuso directamente sobre a mesa ou ao achegarse a peza ao cabezal, sempre en vertical, é posible efectuar traballos de labrado en escalonado e mecanizar rañuras paralelas (mortallado), con distintas profundidades, formas e cavidades. Ademais, cunha fresadora vertical é posible traballar superficies planas e mecanizar distintas formas como rodas dentadas e elementos decorativos; por esta razón o seu uso estendeuse a distintos sectores industriais.

Dentro dos procesos de mecanizado que poden executarse nestas máquinas, ademais dos anteriormente citados, destacan a elaboración de levas, matrices e moldes, así como o perforado ou furado. Pero tamén é importante aclarar que esta máquina conta coa vantaxe de admitir pezas de distintos materiais como metal (distintos tipos e durezas), madeira, plástico, etcétera. Grazas a todas estas características e funcionalidades, a fresadora vertical emprégase en infinidade de industrias, ademais da metalmecánica. É posible atopala no sector automobilístico, aeronáutico, da alimentación, etcétera.