Máquinas ferramenta universais de arranque de apara: cales son?

Para o mecanizado de pezas pódense seguir dous procedementos: de forma manual, con instrumentos específicos, ou utilizando máquinas ferramenta universais de arranque de apara. Estas últimas son as máis empregadas na industria e, á súa vez, clasifícanse en máquinas ferramenta, de corte e de suxeición.

Que é o arranque de aparas?

O arranque de aparas é un procedemento de mecanizado que se practica co fin de obter unhas dimensións específicas para a peza que se está a traballar. Pero por que se chama arranque de aparas? Porque, durante o proceso, sepáranse partes pequenas da peza, chamadas aparas, utilizando, sobre todo no proceso de fabricación, unha máquina ferramenta especial.

As máquinas que se empregan á súa vez poden utilizar gumes determinados e non determinados para realizar o proceso de arranque, é dicir: que os restos ou aparas que se eliminan teñan unha forma xeométrica específica ou que non a teñan. No primeiro caso atópanse as máquinas fresadoras, e no segundo, as máquinas rectificadoras.

Características das máquinas ferramenta

Nunha máquina ferramenta póñense e suxéitanse as pezas que se van traballar; despois, grazas á acción de ferramentas específicas e con movementos determinados, conséguese o arranque das partes que sobran, que se refugan en forma de aparas. Todas as máquinas que interveñen neste procedemento teñen elementos similares:

• Bancada, que é onde se colocan as pezas que se van mecanizar.
• Guías, a través das cales se desprazan as ferramentas móbiles da máquina.
• Motores que fan funcionar a máquina.
• Transmisións, que levan o movemento de acción ás partes móbiles da máquina.
• A máquina tamén se compón de múltiples pancas, volantes e elementos que permiten accionala. Algunhas funcionan con control numérico (CNC).

Máquinas ferramenta universais de arranque de apara

Torno

O torneado é un mecanizado por arranque que emprega unha máquina ferramenta chamada torno. A peza que se coloca nesta máquina terá un movemento circular, mentres que a ferramenta que corta se moverá de forma lineal. A peza que se traballa suxéitase a un prato, mentres que a ferramenta de corte se fixa a un soporte superior para poder desprazarse e realizar o arranque de aparas.

O torno é capaz de realizar procedementos de alta precisión e pode funcionar de forma manual, semiautomática ou a través dun CNC (control numérico), polo que existen distintos tipos de tornos: paralelo ou horizontal, vertical, frontal ou multifuso.

Fresadora

A fresadora é unha máquina ferramenta moi común no proceso de fabricación e mecanizado de pezas pequenas. Ao proceso realizado por esta máquina chámaselle fresado e distínguese polo uso dunha fresa que pode ter un gume ou varios e por un cabezal que se move en tres direccións (X-Y-Z).

O movemento que se realiza é perpendicular ao eixe de rotación da propia fresa, pero tamén se pode mover combinando o xiro da fresa e o da placa base á que está suxeita a peza que se mecaniza. O corte que se realiza depende do movemento que se emprega.

Este tipo de máquinas achegan maior precisión á hora de facer o arranque de aparas; isto débese aos distintos movementos que se poden realizar. Xeralmente, combínanse os tres para un corte eficaz. Existen tamén distintos tipos de fresadoras que se clasifican segundo as súas partes móbiles, o seu número de eixes ou a orientación do cabezal principal (a este vai suxeita a fresa).

Tradeadora

O proceso que realiza unha tradeadora chámase tradeado e consiste na perforación da peza mediante buratos. Para realizar este procedemento utilízase un trade con gumes que se moven de arriba abaixo, de forma xiratoria, e penetran no material que se vai cortar. A tradeadora ten un cabezal ao que se lle coloca unha broca que, ao xirar, elimina as aparas.

Para o tradeado de pezas pódense utilizar distintos tipos de ferramentas. Se se quere facer o proceso de forma manual, emprégase o trade de man, que é o máis coñecido. Pero tamén se empregan outro tipo de máquinas como o trade de columna, o de sobremesa e o radial.

Serra

A folla de serra emprégase para o mecanizado de pezas a través dun proceso coñecido como serrado. Este procedemento pode facerse de forma manual ou a través dunha máquina e consiste en deslizar unha folla de serra nun movemento cara a adiante e cara a atrás para realizar o corte. A ferramenta principal é a folla de serra, que ten dentes capaces de xerar un corte fino na peza que se mecaniza. A característica principal da folla de serra é que os dentes están lixeiramente separados, o que permite que o corte que se efectúa arranque aparas ou separe a peza en dúas partes.