Zertan datza abellanatze-teknika?

Piezen tratamenduan eta materialen lanketan, torlojutze- eta zulaketa-lanak oso ezagunak dira, eta ia mundu guztiak egin ditu inoiz (brikolajearen esparruan bada ere). Koadro bat edo ispilu bat zintzilikatzeko edo altzariren baten piezak muntatzeko izan, hasiberrienek eta esperientziarik gabekoenek ere arazorik gabe egin dute. Baina badira beste teknika konplexuago batzuk, hala nola abellanatzea.

Abellanatzea hainbat erabilera dituen teknika mota bat da. Haren prozesua zulaketa- eta torlojutze-tekniken artekoa da. Muntaketak egiterakoan erabiltzen da, koskak leuntzeko eta zuloetan ahokadura koniko bat egiteko. Hau da, torlojuen buruak sartzeko erabiltzen da, landutako gainazalarekin berdin gera daitezen.

Abellanatze-teknika metaletan zein egurretan egin daiteke. Bi kasuetan, zulaketaren ondoren eta torlojutu aurretik egiten dugun prozesua da. Torloju askok kono itxurako akabera dute; beraz, erraza da haien goiko muturra lantzen ari den gainazalean ez sartzea. Abellanatzeak mota horretako arazoak eta akatsak konpontzen ditu.

Prozesu horren bidez, akabera hobea eta gainazal guztiz leuna lortzen dira, torlojuak edo iltzeak egon arren. Badirudi abellanatzea estetika-kontua baino ez dela, baina ez da horrela. Abellanatzearekin, torlojuaren presioa hobeto banatzen da gainazalean, eta, horrela, epe labur eta luzera arraildurak sortzea saihesten da.

Edozein abellanatze-prozesu egiteko, material espezializatua behar da. Egurraren kasuan eskuz egin dezakegu, baina beti da hobe abellanatze-teknika egiteko prestazio espezifikoak dituen zulagailu multifuntzional bat izatea.

Jarraian, abellanatze mota desberdinak ezagutuko dituzu, bai eta nola egin urratsez urrats ere.

Abellanatze motak

Hainbat abellanatze mota daude. Bakoitzaren helburua antzekoa bada ere, erabilera-gainazalaren materialean bereizten dira. Ikusi duzun bezala, teknika hau egurretan eta metaletan aplikatzen da; beraz, material bakoitzerako abellanatze zehatzak daude.

Abellanagailu konikoa

Abellanagailu mota hau zulagailuaren barrena baten antzera dabil. Hau da, biraketa-mugimendu ebakitzailea egiten du. Hala ere, zulagailu batek baino bira gutxiagotan egiten du lan, bere helburua ez baita zulatzea, txirbil txikiak ateratzea baizik.

Antzeko geometria duen objektu bat muntatuko den gainazal bat zulatzean sortzen diren bizarrak kentzeko balio du. Abellanagailu konikoa metalean zein egurrean erabil daiteke, eta gainazal bakoitzerako modelo espezifikoak daude.

Abellanagailu laua

Abellanagailu hau oso erabilgarria da buru lauko torlojuetarako, hau da, goiko muturrak forma konikorik ez duenean. Erremintaren ardatzarekiko ebaki perpendikularrak egiten ditu, eta horrela nahi den forma lortzen da zulatutako hutsunean.

Oro har, abellanagailu laua hainbat motatako metaletan eta aluminioetan erabiltzen da, eta era guztietako bernoak eta azkoinak muntatzeko balio du.

Abellanagailu zilindrikoa

Kontrazulagailu izenez ere ezagutzen da. Egurrerako zein metalerako balio du, eta abellanatzea erremintaren ardatzarekiko angelu zuzenean egiten du. Metaletan, zulagailuaren barrenak uzten duen akabera irregularra leun dezake.

Haren erabilera ohikoenetako bat su-armen kalibreak konpontzea da.

Abellanatze-prozesua urratsez urrats

Abellanatze-teknika egiteko, garrantzitsua da erreminta onak eta mota honetako erremintekin lan egiteko oinarrizko trebetasunak izatea. Inoiz ez baduzu torlojurik jarri edo zulorik egin, ez da gomendagarria abellanatzearekin hastea. Egurrezko pieza baterako prozedura hau da:

1. Lehenik eta behin, zulo txiki bat egitea gomendatzen da zulagailuaren barrena fin batekin, gero dagokion pieza sartzea errazagoa izan dadin.
2. Torlojua sartu aurretik, komeni da argi izatea zer berno mota erabiliko den eta zer neurri dituen. Torloju mota ugari dauden bezala, abellanagailu-tamaina desberdinak ere badaude.
3. Hurrengo urratsa abellanatzea egitea da, eskuz edo zulatzeko makinarekin. Batzuk zulaketaren ondoren erabiltzen dira. Baina badira barrena erdian sartzeko aukera ematen dutenak ere, eta horrek prozesua are erosoagoa eta zehatzagoa egiten du.
4. Azkenik, torlojua sartzen da, bihurkin batekin edo zulagailu batekin. Ikusiko duzu pieza guztiz muntatuta eta koskarik gabe geratzen dela. Abellanatze-lan gehiago egin ahala, azken emaitza askoz hobea izango da.